小白觀點：唔想做「犬佐級」好正常
唔講唔知，原來消防處常務訓令明文規定，員佐級宿舍唔畀養狗，之但係主任級宿舍就任養唔嬲，擺明就係大細超，玩階級歧視，散仔唔嬲就假咯。不過講到最㷫嘅，就係因為呢條過時例，結果好多又得意又可愛嘅火警調查犬，全部畀啲高官攞晒返屋企，員佐級猛呻大細超。
其實，小白老弟就認為無可厚非嘞，如果消防犬識得自己組織番個工會，我覺得佢哋都想住Good啲，唔想做「犬佐級」。
冇計啦，係人都知消防員係紀律部隊，講求階級分明好應該，正如做消防總長呢階級，唔止高薪厚祿，仲有架F字車牌公配車任用，遇禁區入禁區，真係唔恨得咁多，況且我覺得做消防高官有番隻狗仔，其實都好正常啫，畢竟畀人影到拖狗行郊野公園，總好過見到佢拖女散步吖，係咪？
Email：sunsiupak@gmail.com
Blog：http://sunsiupak.blogspot.com
阿豪觀點：消防懶巡查照養可也
唔講唔知，消防員宿舍原來係唔畀養狗嘅，不過只限員佐級人員，長官就不在此限。吖，唔知消防員被發現養狗嘅話，會唔會好似公屋居民咁要實行扣分制，扣滿分要畀人攆走呢？
呢個規定唔單止有大細超之嫌，仲影響埋員佐級申請做領犬員添。事關消防處○六年招募領犬員，住宿舍嘅員佐級人員連養狗都唔畀，又點有機會獲選呢？如果真係咁樣，又幾有問題喎。因為據講其他紀律部隊都係由員佐級人員擔任領犬員，依家消防處由主任級兼埋，係咪意味住其實佢哋本身都係「開工不足」，可以玩吓狗呢？
不過咁，其實消防員如果真係愛心爆棚，一於照養可也。你知啦，消防處連突擊巡查食肆嘅消防設施都懶懶閒，要成四十年至可以查晒全港食肆，幾時得閒巡查埋同袍宿舍呢？
Email：lukchiho75@hotmail.com
Blog：http://lukchiho.blogspot.com
網友觀點……
阿水：消防處又幾照顧啲長官噃，唔知仲有冇畀埋養狗津貼呢？
好狗：可能上頭覺得啲長官比較清閒，就准佢哋養狗解悶囉。
死狗：消防員應要人人養隻狗嚟培養愛心，多啲愛心係市民之福！
甘仔：呢個正係推動散仔向上嘅動力，想養狗做長官啦！