前景儘管看淡，不過卡梅倫拜相始終蘊含積極意義，起碼民間有一對窮鬼鴛侶感到欣慰，實現了「貧賤夫妻無事哀」的理想，以下是兩公婆枕邊蜜語──

老婆：「老公呀，個衰仔又考試肥佬喇，今次仲衰到考第尾，真羞家！」

老公：「考第尾？好呀，冇得頂！卡梅倫細細都係讀書不成壞學生，成績經常包尾大幡，你睇你睇，家陣幾咁威風！所以話呢，少壯不努力，老大有衣食！」

老婆：「咁又係噃……之不過咁，我懷疑個衰仔學人吸毒，點算呀？」

老公：「你懷疑啫，佢有冇認吖？如果打死唔認，就係可造之材，阿仔前途無可限量呀！事關傳聞卡梅倫細細個都有吸食大麻，而且幾乎趕出校，不過佢始終冇認，咁就飛黃騰達。」

老婆：「哦，原來如此，我幾乎怪錯個仔添。咦，咪住，死佬，今個月家用呢？米缸冇米喇！」

老公：「放心啦，英國二百幾萬人失業，財赤萬幾億港紙，仍然唔怕學似希臘瀕臨破產。我作為失業漢，我向你保證，只要精神不滑坡，辦法總比困難多，畫個餅咪可以充飢囉，老婆！」