香港公共醫療醫生協會嘅調查發現，近九成三受訪醫生唔滿意現時嘅紀律處分制度同處理事故手法，指制度既唔透明亦唔公平。超過八成半人話，因為唔使照顧病人，管理層可以逃避醫療事故責任，毋須接受處分。即係話，一旦有事，落手落腳做嘢嘅醫護人員要孭飛，指手畫腳老點嘅官員就唔使上身，點啱數先？

該會會長何栢良質疑公立醫院高層「年薪攞幾百萬，點解做錯嘢，唔使向市民負責任」？係咯，主管醫療衞生嘅食物及衞生局局長周一嶽，你識唔識答呢個問題呢？

冇錯，好多醫療事故係因為前線醫護人員疏忽引起，例如斷錯症、開錯藥、輸錯血、割錯器官等等，通常涉及前線員工敷衍了事，或者冇按程序及指引去做。不過咁，如果管理層有足夠巡查督導，及時糾正錯誤，好多事故完全可以避免。所以，公立醫院醜聞無日無之，前線醫護人員固然有責任，但醫療衞生高官管理混亂、監管失職都難辭其咎喇。

至弊呢班高官一向有過不究，毋須問責不特止，仲一味推卸責任，有鑊就下屬孭，好官我自為之，仲厚住面皮年年幫自己加人工，你話前線醫護人員有乜辦法唔氣頂？公立醫院有乜辦法唔立立亂吖？

講開問責制真係得啖笑，咪話醫療亂象冇人理，就算成個政府立立亂，一樣冇人問責。所謂問責制，話就話吸納社會各界精英，為港府施政引入新思維，但事實根本係兩回事。

話時話，喺老懵董時代，問責制都仲有些少睇頭，至少有幾個高官因為衰咗要執包袱。但自從煲呔曾上台，無論爆幾大鑊，從未有一個高官被問責。嗱，就講番醫療衞生，公立醫院亂過亂世佳人，周一鑊作為問責局長繼續享受高薪厚祿不特止，舊年仲攞埋金紫荊星章添，試問佢何德何能吖？

其實，全世界都行緊問責制，唔同嘅係，人哋係名副其實嘅問責，而香港係掛羊頭賣狗肉嘅問責。唔使講咁遠，就睇番內地，無論沙士、毒奶粉定礦難，甚至冧咗幢樓，失職官員假假地都要落台謝罪。唯獨喺香港，問責制唔止變咗卸責制，更成為保護無能高官嘅金鐘罩、鐵布衫。

唉，煲呔曾日日翹埋雙手等收工，手下班高官個個做一日和尚撞一日鐘，香港點會有運行呀。計太一叮話齋，港府不如盡快摺埋呢個山寨版嘅問責制，以免再獻世。叮！