小白觀點:山寨廠蒙受奇冤

內地發生咗單電腦櫈爆炸事件，有位女士坐坐吓，籮柚突然爆出巨響，名副其實炸到屁股開花，認真得人驚。好多人諗都唔諗，就入晒山寨廠數，冇錯，我國黑心商人確係幾無良，但如果佢哋做得出一張會爆炸嘅櫈，淨係做拉登嘅生意已經做唔切啦，使乜為百零蚊賤價害人？

其實唔可以一口咬定係電腦櫈肇禍，因為呢種講法好唔科學，所以山寨廠今次蒙受奇冤，應該要旁徵博引辯護。屁股爆炸成因好多，呢嗱，有本叫《為甚麼男人有乳頭》嘅暢銷書，指出人類大腸內嘅細菌會將食物發酵，再變成氫同甲烷呢啲易燃氣體，所以嚴格嚟講，放個屁原來真係可以着火爆炸㗎！唉，所以話呢，嗰啲政客屁股決定腦袋，唔讀多啲書，如果唔係，使乜為咗一單放火燒車嘅陳年舊事左右為難、愈講愈亂吖，反正都係屁話，索性話嗰單係車內人體自爆，咪可以將罪名洗得一乾二淨囉！

Blog:http://sunsiupak.blogspot.com

阿豪觀點:教精咗恐怖分子

話人踎監踎到屁股開花就聽得多，原來坐電腦櫈都可以坐到爆炸，炸傷人個屁股，你話係咪得人驚吖！

呢單咁恐怖嘅新聞發生喺福建，話說有個OL坐喺氣壓椅吹頭髮嗰陣，張櫈突然爆炸，爆炸產生嘅衝擊力將個OL嘅臀部炸傷，張櫈嘅螺絲碎片更加射入佢體內，睇吓張現場相真係夠晒核突。

豪伯覺得呢單嘢無錯係值得關注，但係有啲媒體將呢單嘢炒到大一大，似乎有點兒那個喎……又模擬動畫又透視圖咁，爭在未教人點樣製造「炸彈櫈」。豪伯真係擔心，依家社會怨氣咁大，有人照辦煮碗整番張，然後偷偷哋換咗老細坐嗰張櫈，又或者為恐怖分子提供咗「創作靈感」，咁咪弊傢伙？

據聞出事嗰張櫈係山寨貨，所以話啫，內地山寨出品，必會為原裝產品增值，今次氣壓椅附送爆炸功能，就係一個明顯不過嘅例子嘞！

Blog:http://lukchiho.blogspot.com

網友觀點

陳居士：閉門家裏坐，禍從櫈上來！

小　賓：唔少人患咗氣壓椅恐懼症，要心理輔導至得囉！

駱駝祥：國產山寨貨嘅殺傷力咁大，拉登唔知有冇入番啲貨呢？

羅友大：消委會最好測試吓各款氣壓椅，令市民坐得安心啲。