依家人人講環保，倡議低碳生活，身為「低碳達人」嘅天文台台長李本瀅，同滙豐銀行亞太區企業可持續發展總監區佩兒，尋日喺「香港減碳行動」閉幕禮暨嘉年華度，就教大家點樣喺生活嘅細節上減碳。
李本瀅話日日都過緊低碳生活，每日都係以沙律同多士為主食，唔單只卡路里極低，就連碳排放都非常少，再加上佢平時會盡量行路，減少搭車，所以真係想肥都難。佢仲話為咗買少幾件衫，一直都逼自己keep住依家呢個身形，唔畀自己肥。唔好以為台長得個講字，佢真係身體力行㗎，事關佢身上嘅恤衫同皮鞋都着咗超過十年，對鞋仲係佢太太送畀佢嘅添，睇嚟台長除咗環保，仲好長情噃。
之不過，女人唔shopping慘過畀蟻咬喎！區佩兒都話好難做到唔買嘢，所以買衫時只會揀啲襟興啲嘅，唔着嘅舊衫亦會轉送畀朋友或捐出去。