每逢政壇有事發生，「搞事四人幫」都會出嚟攪局，今日立法會補選投票日都唔例外。「民主阿婆」陳方安生尋日就蒲頭阿支阿左，幫手拉票之餘仲狠批哎吔細佬煲呔曾，話從來冇聽過有問責官員杯葛合法選舉，簡直係國際大笑話。佢講得㷫起，仲直斥煲呔曾做法左閃右避，質問佢點解唔一早講明唔投票。民主阿婆之後又鬧煲呔曾帶頭唔投票，會令公務員擔心投票會被標籤云云。
民主阿婆鬧得咁落力，莫非想借哎吔細佬煲呔曾過橋谷補選投票率？不過即使真係咁諗都唔出奇嘅，事關佢頭上嘅政治光環早已褪色，影響力微乎其微；如果唔係靠鬧人谷投票，唔通靠佢自己咩！佢又自爆老公近日去完倫敦返嚟患上大感冒，未知今日會唔會去投票，如果身體許可都會去投票喎。唉！民主阿婆睇得啲選票咁重要，唔知佢會唔會夾硬拖埋唔舒服嘅老公去投票呢？