前旅遊事務專員方舜文喺舊年年底辭職過檔貿易發展局做副總裁，搞到滿城風雨，仲被揭發佢唔使好似一般公務員咁先過冷河再轉工，之後為咗早啲返新工，放棄咗兩個月薪酬合共三十幾萬元，不過貿發局就暗啞底補貼咗佢部分損失。
方舜文上月返新工之後一直冇公開露面，難得前晚喺一個籌款晚宴度見到佢，梗係捉住佢問吓過檔嘅事啦，點知佢即刻瞪大對眼，笑騎騎咁話冇嘢補充。
其實，佢一聽到關於佢跳槽風波嘅問題已經想閃人，梗係想閃得愈快愈好，但可能話晒喺官場做過推廣旅遊嘅工作，知道乜嘢叫做以禮待人，所以肯企定定同記者寒暄幾句。佢一再強調自己辭職係跟足正常程序，要講嘅嘢同政府早前出嘅回應一樣，唔會再有補充，講完後即刻封嘴，多一句都冇。
幾個月冇見，方舜文除咗轉咗份工、銜頭唔同咗外，仲好似發咗福。唔知係因為新公司人工高福利好，定係無官一身輕，所以心廣體胖呢？