晨早七點半，佢哋已經坐咗喺大埔鄉委會附近間華輝餐廳歎香滑奶茶，邊飲邊向街坊收料，嗰度最出名係新鮮出爐嘅香噴噴雞批同大大個嘅沙糖蛋球。

歎完茶就行過斜對面嘅大埔墟街市，搜羅漁民自家捕獲嘅鮮魚，學明分別買咗幾百蚊黃立䱽、油　同鱔魚，諗住炮製黃立䱽炆苦瓜、香煎鹹油　同清蒸鱔魚。唔講唔知，其實學明好驚入街市買餸，事關佢係名副其實嘅地膽，檔檔都係友好，冇可能全部都幫襯，所以惟有經常勞煩良哥代勞。

學明對晚餐比較重視，佢嘅「飯堂」除咗屋企同大埔墟大日子酒家外，仲有坐落林村許願樹背後嘅荷曄庭園景餐廳，嗰度有小橋流水充分配合林村大自然環境，佢當晚就柯打咗兩隻三斤幾重嘅原隻澳洲龍蝦做沙律同龍蝦占米多，仲叫咗招牌菜美國西冷牛扒同新西蘭一級香草羊扒各一份，當然唔少得甜品香橙梳乎厘啦。

學明同餐廳邱老闆相當熟落，不時相約談食經，有時學明中午趕時間冇飯食，邱老闆會親為學明炮製鹹魚（馬鮪）雞粒炒飯，呢款「學明炒飯」係獨一無二㗎！