為咗推動文化藝術發展，民政事務局副局長Florence許曉暉早前特登走去學粵曲，早幾個月前出席一個粵曲慈善欣賞會時，已經初試啼聲獻唱一曲《劍合釵圓》，唱得有板有眼。佢前晚再踏台板，喺一個籌款晚宴上孖住醫院管理局主席「肥胡」胡定旭合唱一曲《帝女花之香夭》，一樣精彩絕倫；至於肥胡亦保持一貫水準，令人聽出耳油。
前經濟發展及勞工局局長葉澍堃係個晚宴嘅客席司儀，呼籲一眾在場嘅副局同政助隨緣樂助，可惜佢哋好似冇乜反應。最後喺冇人反對下，終於拍板決定副局一律捐一萬蚊，政助五千蚊，Florence仲話唔單止要同事支持自己，所以都自掏腰包捐咗一萬蚊。
肥胡表演完後話，雖然佢同Florence之前冇夾過，但合作絕對冇問題：「《香夭》係我飲歌嚟㗎，差唔多每次上台表演都係唱呢首，對我嚟講完全冇難度！」