自年初有五個議員辭職後，變相斬斷立法會足球隊兩條「樁腳」，之後有兩場友誼賽都因無法湊夠六個或以上議員嘅「法定人數」而難產。班議員「餓波」五個月，月底終可重出江湖，事關喺二十九號對高官嘅友誼賽已經有七個議員報名，比起之前次次掹掹緊得六個議員落場嚟得踴躍，唔通班議員好唔妥班高官，打算係咁省佢哋波餅？
今次報名落場嘅除立法會足球隊領隊、IT界代表譚偉豪外，白鴿黨都有三個，包括足球中堅分子李永達，仲有平時唔多落場嘅甘乃威同黃成智。上次首次報名就觸礁踢唔成嘅建仔陳克勤再接再厲，醫學界代表「怪醫」梁家騮同最近好出位嘅「旅遊超人」謝偉俊都應承落場踢埋一份。
見到咁多人參加，ＩＴ豪都話好意外，佢之前試過四圍搵人報名，最壞打算係等立法會補番五個議員再去睇吓有冇人肯「臨時入局」，不過佢見出咗通告冇耐就有七個人報名，當堂安樂晒，反而開始擔心大家差唔多半年冇落場，可能對腳會生晒銹，依家度緊喺邊度班啲夠分量嘅外援幫手，或者可能會約埋班議員搞「地獄式」訓練，希望比賽時唔好甩轆。