既然有質疑，仲涉及村代表選舉，新界鄉議局當然煞有介事啦！原來主席劉皇發事前好認真咁寫咗封信畀民政事務委員會，回應呢件事。

發叔話鄉議局從來冇收到任何有關女性喺參與村代表選舉過程中或成功當選後，因性別嘅關係而遇到困難或投訴個案，而局方認為女性喺履行村代表嘅職能上亦同男性無異；以依家嚟講，局方亦覺得不論男女，參與村代表選舉所遇到嘅困難亦無異，同樣係在於資源，仲話選舉經費難以籌集，難以向社區進行更有效嘅宣傳工作。

先係排除晒可能出現性別歧視嘅情況，跟住仲呻籌選舉經費難，但咁都不特止，事關好戲在後頭。

政府淨係識唧牙膏

發叔話喺當今日益進步嘅社會，若果村代表能夠享有更多資源，提升自身能力，就可以為村民提供更具效率嘅支援同服務，仲建議委員會同民政事務總署可以考慮增撥資源，例如以資助形式鼓勵村代表參與提升演講能力、宣傳技巧或說辯能力嘅學習班、電腦課程、危機處理課程等，話咁樣增強對村代表嘅支援，可以大大提高村民參選村代表嘅信心同興趣，吸引更多村民出嚟參與選舉工作喎！

莫財就乜都冇得搞，鄉議局以前成日呻窮，要求政府增加村代表同鄉事委員會嘅津貼，但係政府只係唧牙膏咁酌量加少少，發叔呢招都算高，竟然借男女平等同參選村代表嘅問題打蛇隨棍上，既然要吸引多啲人參與村代表選舉，咪反過嚟伸大手板問政府攞錢囉！

問邊個攞？咪係有「騰雞美華」之稱嘅民政事務總署署長陳甘美華囉，睇怕佢聽到發叔咁講實騰晒雞！