九龍果菜業界委託本港一間大學研究將香港打造成全球最大水果交易平台嘅可行性，希望搵到新發展空間。本港水果貿易遠近知名，好有發展潛力，呢招有得諗噃。但太一叮唔明，咁嘅好事，點解樣樣都話做「中心」嘅港府唔出頭，要業界自己扯大旗搞「水果交易中心」嘅？

話說港府早幾年抽起條筋玩「保育」，將油麻地果欄列為三級歷史建築。呢啲有近百年歷史嘅建築物的確值得保留，但係經營咗成個世紀，果欄本身亦已經不敷應用，要搵第二個地方繼續將傳統行業發揚光大。

估唔到食物及衞生局咁多年都係拖得就拖，一直攞唔出令人滿意嘅搬遷方案。因為地方有限，依家果欄無論係貨物處理量定欄商數目都早已爆燈，冇晒發展空間，令本來大有可為嘅水果貿易幾乎變埋「夕陽行業」。

叮！「保育」幾乎變「絕育」，真係多得政府唔少咯。本港多年嚟都係東南亞等地水果嘅集散地，○八年水果轉口內地數字已經超過三十六億港元。悠久歷史、市場口碑、優質服務，再加上空運、海運方面嘅物流優勢，如果港府關注多啲，做嘢爽手啲，香港完全有優勢同有可能成為全球最大水果交易平台。

仲有，水果貿易亦係勞動力密集型行業，發展得好可以為學歷唔高嘅基層市民提供更多就業機會。只可惜，既可以擴大生意，又可以造福社會嘅好事，落到一班議而不決，決而不行，唔踢唔郁嘅官員手上，竟然變咗無聲無息。即使業界已經達成共識，接受搬去邊境河套區或天水圍呢啲偏遠地方，當局依然無動於衷。

叮！捉到鹿都唔識脫角，眼白白睇住優勢變劣勢。梗係啦，港府高官至叻扮高雅，懶有Taste，聞紅酒聞得太多，邊聞到鮮果果香吖！咪睇佢哋搞埋咁多乜乜「中心」物物「港」，其實乜都假，「紅酒中心」最實際。

高官凡事先益自己，一於減免紅酒稅。呢招果然見效，紅酒銷量直線飆升，舊年本港人均紅酒消耗量比十年前增加近三倍，冠絕亞洲。查實，如果計交易銀碼，紅酒同水果簡直冇得比。根據港府預測，到二○一七年經香港轉口內地嘅紅酒貨值係十七億港元左右，連依家海外鮮果經港轉口內地銀碼嘅一半都唔到。

對香港有利，可以創造更多職位嘅事唔抓緊做，只令少數人得益，甚至被指間接鼓勵醉駕嘅「紅酒中心」就搏晒命推，唔通港府班高官真係飲紅酒飲到酒精上腦？叮！