美國IT網站Gizmodo繼第四代iPhone後又有新搞作，今次佢哋踢爆twitter有bug，可以令啲名人自動成為你嘅粉絲。twitter唔知係咪殺蟲劑落重手咗，蠕蟲冇錯係死晒，點知捉到好多用戶嘅follower唔見晒，呢鋪認真大整蠱。

香港地最流行都係facebook，玩twitter嘅人真係唔多，不過我覺得大家最好快啲跟上潮流。自從上次日本人氣AV女優蒼井空喺twitter現身，即吸引數以萬計中國人翻牆加入同蒼井空神交，你就知twitter嘅威力有幾大啦。

事實上，玩facebook嘅日本人，據講數數埋埋都唔過十萬，twitter就厲害咯，至少有幾十萬用戶。近排由上野樹里同瑛太呢對拍檔主演嘅日劇《無法坦誠相對》，就係以twitter為主題嘞。所以話呢，如果你冇玩twitter，即使一年去十次八次新宿池袋，都唔可以自稱哈日族！

e-mail：sunsiupak@gmail.com

Blog：http://sunsiupak.blogspot.com

阿豪觀點：人人都想做網上明星

twitter被IT網站踢爆有個大漏洞，可以令到任何人成為你嘅追隨者。聽落又好似幾過癮咁喎，如果你有玩開twitter，又希望邊個名人成為你嘅追隨者呢？

爭啲睇錯以為呢個唔係失誤，而係佢哋其中一項服務。大家都知啦，其實個個都想做名人㗎嘛，只要睇吓YouTube啲短片，啲人乜嘢都表演一大餐，其中最鍾意就係模仿歌星。模仿佢哋唱歌唔在講，連彈奏樂器都模仿埋，有好多仲要係好專業，唔單止彈奏到好似大碟咁，仲要連樂器嘅型號都係一模一樣（最出名梗係披頭四保羅彈嘅小提琴形低音結他啦），真係好捨得揼本。

好嘞，各位網友喺過足扮嘢癮之餘，依家話可以令名人做你嘅粉絲，仲可以指定邊一個名人添，你都咪話唔過癮，最好就係可以扮埋名人留言，話好傾慕網主大人啦！

e-mail：lukchiho75@hotmail.com

Blog：http://lukchiho.blogspot.com

網友觀點……

台山仔：梗係揀蒼井空啦！咁辛苦翻牆都係為咗佢咋……

神　父：希望迷途嘅政府官員成為我嘅追隨者，市民就有救喇！

小　明：twitter應保留呢個功能作賣點，宅男用戶肯定激增！

大口仔：受內地歡迎嘅微博最啱加入呢個功能，可過足造假癮！

有料爆

風水師對簿公堂，你估佢哋算唔算到自己嘅勝算呢？

SMS傾埋一份：6016 2496