議員葉劉淑儀批評官員依家一律用職位英文簡寫作電郵名稱，而唔係用真實姓名，做法唔可取。政府資訊科技總監葛輝解畫話官員電郵係咪進一步個人化屬於個人選擇，但佢哋會鼓勵各部門多用互聯網同市民交流。葉劉當然唔收貨，話連美國總統奧巴馬嘅官方電郵都係用自己名，唔明官員點解唔肯用「個人面貌示人」：「問責官員冇理由怕用名，官員驚乜呢？」

跟住「象哥」黃定光亦話好多中小企寧願親自去郵局寄信畀各政府部門都唔用電郵，質疑政府有關服務未能切合中小企嘅需要。葛輝被考起，仲反指中小企可能慣咗有文件揸手做存檔之用喎。象哥即時寸佢：「網上存檔仲方便過hard copy啦！」佢認為問題癥結在於政府宣傳不足。

劉慧卿亦翻舊帳，追問運輸及房屋局局長鄭汝樺（Eva）三小時facebook政治騷事件係邊個官員諗出呢條屎橋，搞到Eva咁鬼瘀皮！

議員數咗大籮政府IT落後嘅例子，而負責資訊科技呢瓣嘅係商務及經濟發展局局長劉吳惠蘭（Rita），歸根究柢佢要負上最大責任喎！