兩個禮拜前，記者先至目擊賭王何鴻燊千金何超雲同男友Andy喺中環歷山大廈嘅Cova買蛋糕返去孝敬賭王，原來呢間係超雲嘅至愛嘅食肆，所以尋日下晝四點幾，又見到佢一個人嚟到，點知座位爆滿，何家千金一樣要等位。喺等位期間，年紀同超雲相若嘅一男一女嚟到同佢會合，二十分鐘後佢哋終於有位，三人有講有笑，坐咗約四十五分鐘就離開。
上前同超雲打招呼，原來嗰兩位朋友係佢喺澳洲讀中學時嘅同學，其中男同學仲攞個手機出嚟叫記者幫佢影相留念添！超雲心情極靚，話男友要開工，唔得閒陪佢，佢自己同中學同學敍舊。問佢點解冇好似上次咁外賣蛋糕畀爸爸食，佢話朝早已經喺酒樓外賣點心畀爸爸，所以唔買蛋糕喇！
超雲好鍾意Cova，極力推介佢哋嘅雪糕同埋蛋糕。佢哋嘅王牌海綿蛋糕一向備受歡迎，難怪超雲都叫記者一定要試吓。