立法會審議最低工資條例草案進入最後階段，備受影響嘅飲食業界連番出招，但唔知係咪立法會飲食界議員張宇人嘅「時薪廿蚊論」引嚟各方抨擊，搞到依家個個成為驚弓之鳥，幾個行內有名嘅飲食業界代表尋日發表完意見後，都唔願意公開立場。
主人家、經濟動力嘅議員林健鋒、梁君彥同與會嘉賓李家祥，亦係話高水平嘅最低工資對行業影響好大，但就唔肯表態究竟最低工資水平應該幾多。
經濟動力尋日個工作坊，邀請咗幾間大型連鎖食肆嘅老闆出席，呻吓最低工資對佢哋嘅影響。某大型連鎖快餐店主席表明，如果最低工資定喺三十蚊，第一時間唔係諗加價，而係諗「精兵制」，五十歲以上首先被裁；另一連鎖麵包餅店經理則表示，本來諗住請人做包裝，都話唔定要轉用機器。不過問佢哋點解依家唔用機器代替人手減低成本，佢哋又口口聲聲話要有企業良心喎。睇嚟最低工資水平仲有排拗嘞！