天文台前台長「黑英」林超英早前曾慨嘆環保好難做，尤其係勸喻大家關注氣候變化時遇到好多阻滯，但佢嘅努力始終冇白費，最近英國皇家氣象會（Royal Meteorological Society）就選咗佢做榮譽會士，令佢受寵若驚。
早幾日黑英喺個人網誌自爆呢個喜訊，佢話啱啱收到嚟自英國嘅信，原來係皇家氣象會寄嚟嘅證書。黑英喺上世紀七十年代曾經喺倫敦學習氣象，當時就加入咗呢個會，轉眼已三十幾年。
對於獲得呢個殊榮嘅原因，黑英估計可能係香港天文台對世界確有貢獻。不過睇番張證書嘅陳述，其實佢哋更加欣賞佢喺天文台工作以外嘅熱誠，尤其係近年高聲疾呼各界關注氣候變化。證書仲引述佢接受世界自然基金會嘅訪問，話氣候變化係全人類面對嘅問題，千祈咪睇小一己之力而唔去做呀。