本文重點
喺○八年十月曾經畀市民投訴違例泊車嘅中西區區議會副主席陳捷貴，尋日再畀市民投訴佢喺出席區議會會議期間，將私人座駕違例停泊喺上環海港政府大樓出面嘅行人路上。陳捷貴上次違例泊車就話自己好黑仔，首次違例泊車就畀人捉到正，唔知今次再犯又點解釋呢？
辯稱趕住開會
陳捷貴尋日接受本報查詢時，承認佢因為趕住開會，加上現場車位泊滿，先至將架車停泊喺行人路，但只係停泊咗十五分鐘。無論如何，根據法例，任何人不得將汽車停泊喺行人路或行人道，違者定額罰款為三百二十蚊。
記得上次違例泊車被揭發後，區議會主席陳特楚去信中西區區議會全體議員，提醒議員身居公職，應善用附近停車場。點知話口未完，有人就以冇位泊車為由違例泊車，知法犯法，犯完再犯，難怪有市民睇唔過眼向本報投訴啦！