根據依家《汽車引擎空轉（定額罰款）條例草案》，如果喺路邊停車唔熄匙，除咗每一小時嘅頭三分鐘可以獲得豁免外，其餘一律罰款三百二十蚊。對於深受影響嘅的士業界，當局只肯豁免的士站嘅頭五架的士唔受限制，難為後面一眾大排長龍嘅的士司機「又開又熄」，最後分分鐘撻壞引擎。

邱騰華唔願妥協

草案一推出，職業司機當然呱呱嘈啦，當中的士業界嘅聲音最強烈，立法會多個工會代表已企晒出嚟力撐的士司機，白鴿黨亦大鬧政府冇切實了解業界需要。不過聽聞邱騰華就懶懶閒，冇乜妥協意願。

富貴黨主席兼立法會航運交通界代表劉健儀、工聯會議員王國興都講到明，如果邱騰華唔讓步，就會提出修訂案，將喺的士站排隊嘅所有的士都納入豁免範圍。不過計一計數，如果冇咗建仔支持，要喺分組點票下通過修訂就有啲危機，所以依家建仔嘅意向好關鍵。

問過加入咗委員會嘅建仔環境事務同交通事務發言人陳克勤同張學明，兩個人都答唔到會唔會支持修訂。學明話現階段唔排除任何可能，但點都唔肯畀一個明確答案；克勤仔都係語意不明，話一定要諮詢吓大家意見先決定到喎！不過有建仔成員就話，依家停車熄匙嘅政策都未可以完全平衡業界同市民嘅利益，所以如果修訂唔係太過分嘅話，都可以諗諗支持！