咁即係點呀？咪就係政府鬥唔過出版商，舉手投降囉。講得好聽啲叫做延期分拆，但係一年後，政府有乜把炮令出版商接受分拆呀？延期只係緩兵之計，等大家都唔記得晒件事，就當乜都冇發生過。

將地圖冊、輔助資料等同課本分拆開嚟，由學校購買，等於割咗出版商身上塊肉，佢哋梗係打死都唔制啦。奇就奇在，當局點解咁容易舉白旗？政府話喎，同意延期分拆，係因為出版商應承凍結課本價格一年。不過，有出版商講到明，今年唔加書價，明年一定要加，加幅仲會比以前大。佢哋搏命呻窮，話學生人數下降，通脹持續上升，如果連續兩年凍結書價，叫業界點生存呀？所以，凍結書價係假，儲埋兩年一次過加鋪勁係真。政府其實係跌落地下執番揸沙咋。

講開又講啦，教科書出版不嬲都無王管，出版商鍾意幾時加價就幾時加價，政府粒聲都唔敢出。班高官一味話，香港推行自由市場經濟，出版商訂教科書價格係商業行為，政府唔可以干預。政府做縮頭烏龜，出版商更加為所欲為。

講真，出版商根本當政府冇到，政府話唔可以年年改版，但佢哋將舊版書換兩張插圖，改幾條練習題，就當新版書賣。出版商知道，唔使理政府，搞掂學校就得嘞。佢哋出盡招數，吸引學校用佢哋嘅課本，又送免費教材，又捐儀器，又喺校刊刊登廣告，仲安排教師免費旅行。

話時話，咁搞法已經有行賄之嫌，政府完全有權阻止。可惜政府不嬲闊佬懶理，畀人鬧得多咗，先至發個文件，要學校唔好向出版商索取捐贈，否則會增加教科書嘅成本咁話。口氣咁鬼軟弱，直情係無牙老虎，出版商睬你都傻啦！之不過，呢啲錢唔會白使嘅，最後咪又係計落課本成本度，羊毛出在羊身上，都係由學生家長扲荷包。叮！

班庸官不嬲抱持少件事好過多件事嘅心態，今次提出分拆教材，只係見市民意見大，做場騷應付吓啫，仲以為可以同出版商扯貓尾呃吓人添，點知傾唔掂數，最終不了了之。

政府吹水唔抹嘴，講乜嘢強政勵治，點知連幾個出版商都搞唔掂，乜架都丟晒。唉，最慘仲係學生家長，又唔知要捱幾多年貴價教科書嘞！叮！