「公職王」范鴻齡（Henry）喺中信泰富炒燶外匯一事後辭去公職，生活歸於平靜。早幾日佢返教會前，同太太及三個朋友去北角七姊妹道嘅群記茶餐廳（下圖）撐枱腳，當日係禮拜日，Henry一身便服，同太太歎番個平、靚、正早餐。呢度嘅早餐平到十七蚊一個，估唔到曾經做過打工皇帝嘅Henry都可以咁平民化。
Henry話，佢間教會喺英皇道，每個禮拜返教會前，佢都會貪就腳去群記歎番個早餐醫肚，仲大讚群記班伙記招呼周到，出品又新鮮，早餐首推佢哋嘅火腿通粉同鮮油多。問到佢最新動向時，Henry透露，呢排都係忙緊家族嘅慈善業務，但對於中信泰富前主席榮智健有意自己出嚟搞生意嘅傳聞，佢就三緘其口，唔肯評論。
記得Henry講過，佢深受母親兩個教誨影響，一個係「吃虧即是佔便宜」，另一個係「人像千層餅」，即係人與人嘅關係好似千層餅，你疊我、我疊你，咪以為自己處境好差，亦毋須羨慕別人。或者就係呢一個教誨，令Henry可以每事處變不驚。