暑假係學生哥最期待嘅假期，做咗年幾嘅理大校長唐偉章都話好期待今年暑假早啲嚟，事關佢新上任以嚟唔敢遠行，捱到今個暑假先敢遠遊美國，打算同太太拍拖遊覽被譽為美國風景最靚嘅Sedona，睇盡奇山怪石，仲話要盡情行山、踩單車喎。
唐校長尋日去中國會食晏，講起暑假，佢就好興奮，睇嚟真係等緊開心放暑假。佢話，今次會去美國阿里桑那州嘅Sedona，當地有個著名國家公園，滿布巨型岩石，遊客置身當中，恍如走進雕塑館，加上土壤含氧化鐵，岩石呈現亮麗嘅紅棕色，喺斜陽照射下，用傻瓜機都影到明信片質素嘅相。
計劃盡情遊玩之外，佢都時刻諗住「撲水」，佢尋日預告六月理大會搞個粵劇籌款，搵嚟粵劇大老倌喺新光戲院上演好戲。唐校長雖然有「理大秋官」之稱，可惜佢讀番書出身，唔識做大戲，所以唔會粉墨登場。