政改方案嘅討論焦點之一係功能界別存廢，泛民同壓力團體郁吓就話功能界別只為小眾利益，又話小圈子、百零票可以當選，少數人壓倒多數人等。畀人妖魔化咁耐，功能界別一直沉默是金，直到尋日立法會政改小組委員會開會時，功能界別議員終於大反擊，富貴黨主席劉健儀（Miriam）更火都嚟埋，即場要求政府畀番啲尊嚴佢！
Miriam喺會上話，航運界選民唔多過二百個，佢多次要求當局擴大選民基礎但都食檸檬，搞到議會嘅泛民同僚譏笑佢，外間嘅人侮辱佢，令佢好嬲。Miriam仲即場向政制及內地事務局局長林公公話：「可唔可以畀番少少尊嚴我？」搞到林公公唔知點回應。
漁農界黃容根亦話香港嘅菜、禽、畜都關佢事，連漁民喺境外海域出事佢都要理埋，你估功能界別議員易做呀？其他功能界別議員都發威，廠商會林大輝、總商會林健鋒、工程界何鍾泰好似夾定咁開炮，有議員仲話功能組別議員一樣好勤力，仲嗌啲泛民議員唔好妖魔化佢哋，不如大家集中精力搞好經濟好過。