郁吓就買番市民嘅牌

立法會一個小組委員會尋日討論本港漁業發展，漁業可持續發展委員會建議政府修例，禁止拖網及外地漁船喺本港水域捕魚，同時推出自願性漁船回購計劃，藉此保育本港漁業資源。不過，議員對於呢啲建議有好多不滿，有人批評政府郁吓就掟錢出嚟買番市民嘅牌，認為當局「摧毀一個傳統行業容易，重建就難上加難」。

亦有議員批評近年本港漁業同農業發展阻滯多多，質疑周一鑊將兩個行業「玩到半死」，飲食界嘅張宇人更加話：「本港漁業值得保留，唔可以下下用錢買起，叫人上岸。」建仔嘅譚耀宗就認為，政府如果一次過建議禁止拖網作業，可能扼殺漁民生存，必須好小心處理。