麥瑞琼採封嘴政策

最低工資水平掀起爭論後，張建宗一直唔肯伸個頭出嚟，只係話會聽各界意見，仲一早打定如意算盤，遲啲向立法會提交一個框架法例，既冇敏感數字，內容更好溫和，希望各界支持。呢個滑頭做法本來可以避過好多批評，可惜港大最新嘅調查顯示，政府眾官民望齊齊插水，張建宗雖然唔係插得最勁嗰個，但係支持佢做局長嘅人少咗三個百分點，反對嘅人又增加咗兩個百分點，依家最低工資立法工作啱啱開咗頭，佢嘅民望已經係咁插水，遲啲容乜易變榜尾甚至跌出排名榜㗎？

公眾人物都識愛惜羽翼，所以有份制訂最低工資水平嘅麥瑞琼尋日採封嘴政策，話最低工資嘅問題太敏感唔想評論。「聽吓無妨，講就免喇」可能係臨時最低工資委員會家吓嘅立場，費事順得哥情失嫂意，又無端端畀外界批評。

咁今年人力市場嘅表現又點呢？麥瑞琼即刻就好輕鬆咁話，零售業界有啲會員嘅調查顯示，好多夥計都有人工加，加幅介乎百分之一至百分之四不等，啲員工應該會拍晒手掌啦。不過，佢都強調，做僱主嘅就未必咁輕鬆，事關家吓經濟好番啲，好多舖頭續約時都遇到難題，有啲舖頭新租要加四至五成，負擔好重o架。

我哋兜個圈問佢，咁最低工資同加租邊個難捱啲？麥瑞琼仍然密不透風咁話：「好難一概而論！」