小白觀點:蚊型研究所得啖笑
有學者比較香港、上海同廣西三地大學生嘅中國語文能力，結果本港大學生包尾，仲批評取消範文教學係語文能力下降嘅幫兇。呢啲咁嘅調查真係無謂，比較三個地方就將香港大學生踩到做地底泥，太過唔科學喇，換轉一個角度嚟講，可唔可以話港生嘅中文水平係全國第三吖？
由此可見，香港大專院校嘅學術水準認真得啖笑，有時見到啲學者掛住「乜乜研究所所長」牌頭，聽個名好巴閉，仲以為呢個地方大到好似太空總署咁，當所長一聲令下，研究員腳步匆忙走嚟走去，又有學者埋頭苦幹，後面幾排server燈嘟嘟聲閃唔停……
實情係點？原來所謂研究所，只係枱一張加幾張摺櫈，牆邊有棟借咗幾年唔還嘅書，仲有一個未食完嘅飯盒咁大把，一個戇居教授活喺自己嘅象牙塔研究所，名副其實係「居者有其所」！
Blog:http://sunsiupak.blogspot.com
阿豪觀點:誤人子弟惡性循環
本港學生語文能力屢被批評每況愈下，有語言學者去年比較香港、上海同廣西三地大學生中國語文能力，結果本港大學生包尾。
最令人擔心嘅係，如果班學生語文水準真係咁差，咁佢哋以後又出嚟教書，咁咪形成惡性循環囉……
呢方面，豪伯都可以話係有切身經驗。話說讀中學嘅時候，有個奀皮仔喺周記度講述聽音樂會嘅經歷，其中一句係：「我睡着了，覺得很×而離去。」個「×」字，當然係唔出得街，部首屬「門」嘅字啦，結果個老師只係若無其事咁幫佢改番做個「悶」字就了事，你話佢中文水平係咪低過初中生吖？
至於英文，就更加不堪提。當年有個英文老師，佢控制秩序嘅撒手鐧竟然係一句：「你哋再嘈我就教書！」（當時係自修堂），最得人驚嘅係，佢一講完當堂鴉雀無聲，你話死未？
Blog:http://lukchiho.blogspot.com
網友觀點
老 夫 子：學生唔背誦又點能夠有效提高語文能力？範文教學實際得多啦！
小 文：港生係咪用得潮語火星文多，搞到中英文都唔掂呀？
體育老師：唔知有冇比較埋啲老師呢？學生語文能力差，老師都有責喎！
毛 筆 周：依家學生咁依賴電腦，隨時連寫字能力都喪失埋！