這令筆者想起煲呔曾被追問「樓價高企、炒風熾熱」。樓市發展不正常，政府招式多多依然未能有效遏抑樓價飆升，市民上車難，政府後知後覺，到火燒眼眉才悠然驚醒，耍出花拳繡腿，好睇卻止唔到咳！眼見「資助置業」問題逼到埋身，煲呔曾答曰，未來五個月先諮詢，後交代。一拖就秋分喇，屆時又唔知係乜嘢世界！

煲呔曾最叻就係拿民意做擋箭牌，資深議員都知佢神龍擺尾嘅厲害，拖吓拖吓，到時冇共識再解畫未遲，印印腳又等過冬，呷口紅酒低吟：「驚秋又亮菊花刀，我花開前百花凋，唾沫並非無情物，半是毒藥半瓊醪。」哈哈哈，既然連元朗樓都買唔起，後生仔，再等吓，希望總在人間！

港府過去幾年的施政報告，完全沒有展示長遠的扶貧政策，對弱勢社群斤斤計較，長者生果金都想加入資產審查。復建居屋資助夾心階層，令弱勢社群家家有層樓？咪講笑喇！餘下任期，一於學文物鑑定專家速成秘訣：拿到東西，先掂分量，如果不重就是清代的，如果發亮就是明代的，舔一舔是甜的就是唐代的，摸一摸是濕的就是漢代的，如果為此事動起手來就是戰國的，如果需要討價還價就是商代的。

煲呔曾既拿不出任何良策抑樓價，扶貧又漫無目標，一於做速成文物鑑定專家，憑感覺發指令，無招勝有招，點都好睇過假諮詢真拖延。