今年初，土瓜灣馬頭圍道冧樓慘劇導致四人無辜喪命，平時唔踢唔郁嘅港府事後突然發威，一個月內巡晒全港所有樓齡五十年或以上舊樓。結果，屋宇署唔止準時交功課，仲係「成績斐然」嗰隻。

署方報告話，巡查咗四千幢樓宇，需要緊急維修嘅只有兩宗咁大把，涉及嘅不過係窗口同外牆批盪鬆脫、露台出現裂痕呢啲細眉細眼嘢，並無發現結構危險，百分之百「宜居」。亦即係叫班舊樓住客放心住，萬事大吉冇有怕。

咪住！根據屋宇署資料，署方淨係今年一至三月接到嘅舉報個案，已經比舊年同期多三成幾，有一萬一千幾宗，其中涉及危樓嘅個案升幅更高達七成六。咁就奇嘞，呢頭屋宇署拍晒心口打包單，嗰頭樓宇有問題舉報數字搏命飆，唔通係市民無端白事報「流料」？

叮！原來問題出喺屋宇署。當局大陣仗巡查樓齡五十年或以上嘅舊樓，但係對樓齡介乎三十至五十年嘅樓宇就一於扮盲，詐睇唔到。呢嗱，馬頭圍道離上次冧樓慘劇現場冇幾遠有幢五層高舊樓，樓齡超過四十年，唔止外露鋼筋銹蝕、石屎剝落，兩條樑睇落好似隨時要斷咁，業主要用工字鐵同金屬支架撐住，以防萬一。咁嘅環境，係人都驚冧樓啦，業主惟有主動通知屋宇署。點知對方話，暫時冇計劃巡查呢類樓宇。

咁即係話間樓未達「耆英」級別，屋宇署冇眼睇啫。叮！唔理實際，淨係按樓齡決定係咪巡查，既唔科學，更加係荒謬。有工程學界專家話，如果樓齡超過三十年而又冇經常維修保養，樓宇安全系數會極低，牙煙到極。

係人都知，好多舊樓業主為咗增加收入，罔顧結構安全，將間屋亂咁改建，劏房出租情況相當普遍，同樓齡完全無關。屋宇署唔係戇居到以為裝修師傅淨係會揀五十年或以上樓齡嘅單位拆牆鑿窿啩？少於五十年嘅樓就闊佬懶理，任由情況惡化，唔怪得涉及危樓嘅舉報愈來愈多啦。

叮！既然唔同樓齡嘅樓宇都一樣有潛在危機，當局應該盡快擴大巡查範圍，資源唔夠就即刻補夠，咁至正路㗎。屋宇署唔增撥資源不特止，反而堅持按計劃削減非公務員合約員工，喺二○一二年四月前將員工數目由一千七百人減到約一千人，實在匪夷所思。

計太一叮話齋，屋宇署巡查舊樓不過係敷衍民意齋做騷，按樓齡一刀切睇啲唔睇啲，遲早再爆大鑊。呢啲就叫屋柱冇鋼筋實冧樓，屋宇署冇腦筋就聽死人嘞。叮！