呢個活動有一百四十六架輪椅參加，仲破埋世界健力士最長輪椅巡遊隊伍紀錄添。不過一眾傷健人士，似乎就對政府推行咗好多年嘅「無障礙通道」唔係太滿意噃，有女士仲話：「話就話係傷殘人士廁所，但門口又有幾級樓梯，咁即係想點呀！」

講起「無障礙通道」，林煥光亦為班傷健人士出番啖氣。佢話補選就快殺到，平機會亦啱啱收到選舉事務處嘅資料，知道依家仲有百分之十五，即係六十幾個票站係傷健人士入唔到嘅，炮轟政府唔上心。

佢話：「過去十幾年連無障礙票站咁小事都做唔到，政府喺呢方面會唔會係好唔積極呢？」仲話希望政府喺下次選舉前，可以畀人睇到佢哋有明顯改善。咁佢會唔會喺補選投票呢？佢就即刻笑笑口咁話，投票係公民責任，到時會以個人身份決定投唔投票喎！