國際青年商會香港總會早前舉行慶祝六十周年餐舞會，唔少政圈中人都畀面撐場，例如行政會議非官守議員召集人CY梁振英同沙田區議員龐愛蘭咁。原來佢哋都曾獲「十大傑出青年」獎項，龐愛蘭更加係現任「香港傑出青年協會」主席，而呢個人氣活動嘅搞手正係青商會。
青商會香港總會長Gene鄧長政當晚忙到飛起，佢話佢哋總會長係一年一任，所以今年實要瞓身做好青商會嘅活動，青商會旗下十九個分會每年舉辦嘅活動多達三、四百個，忙到佢經常要捱飯盒。
雖然個會嘅知名度唔夠十大傑青選舉響亮，但Gene話佢哋至緊要將個活動搞好，事關商會成立嘅目的係培訓年輕人嘅領導才能。Gene嘅父親鄧兆偉當晚都有出席活動，佢係三十年前嘅總會長，佢笑謂希望三十年後輪到孫仔做總會長，但佢新抱仲未夢熊有兆，睇嚟Gene要努力啲喇！