立法會議員上海世博團尋日繼續第二日行程，參觀咗六個展館，適逢母親節，政制及內地事務局常任秘書長羅智光設午宴招待大家時不忘賣口乖，祝一班已為人母嘅女議員母親節快樂，多謝佢哋不辭勞苦咁嚟到上海，仲話立法會好似政府嘅母親添！唔通班高官畀議員折騰得多，成日諗起細個時食阿媽藤條炆豬肉嘅慘痛情景？
羅智光話，對政府嚟講，立法會嘅角色就好似阿媽咁，因為政府要用錢，須經立法會撥款，就似阿媽畀錢仔女用一樣喎。嘩！政府申領撥款動輒億億聲，但係施政又唔見好得去邊，按羅智光嘅邏輯，政府係個好唔生性嘅忤逆仔嚟喎！所以，有議員即時反駁話立法會似政府阿爸多啲，事關成日打仔嘛！
立法會內嘅母親級議員，例如劉健儀、葉劉淑儀、梁美芬、梁劉柔芬同李慧琼咁，全部都有參加世博團，尋日羅智光生硬咁將世博團同母親節扣上關係，唔知佢哋受唔受落呢？