近日香港民怨四起，其中一個政府搞極都搞唔掂嘅問題，係立法會議員王國興所講嘅「陽宅貴、陰宅難」，政府話研究將工廠大廈改建為多層式骨灰龕堂，但到依家仲係冇乜聲氣。有見及此，由白鴿黨「肥仔明」李華明做主席嘅食物安全及環境衞生事務委員會，打算九月去全亞洲以高樓大廈做骨灰龕做得最成功嘅東京考察，希望可以吸取到當地搞骨灰龕嘅經驗，以取長補短，盡快解決本港墓地短缺嘅問題。
肥仔明仲會帶一眾議員去埋北海道睇當地漁業嘅發展，話要睇吓會唔會為本港日漸式微嘅漁業帶嚟啟示喎。北海道漁業表面上睇同香港好唔同，去考察啲乜嘢實在較難理解，如果話去北海道考察魚生嘅質素，可能會直接易明啲喎。
無獨有偶，衞生事務委員會都計劃喺九月，由委員會主席、衞生服務界代表李國麟領軍，去日本研究當地醫療融資同保險制度嘅運作。不過大家可能會覺得奇怪，要研究醫療融資問題，睇文件可能仲清楚啦，點解要花錢去考察呢？