運輸及房屋局局長Eva鄭汝樺喺母親節前夕，做咗個電台錄音訪問，暢談同媽媽、兩個囡囡三代嘅母女相處之道。咪睇Eva平時一臉嚴肅，喺八十二歲嘅媽媽面前，一樣只係個小朋友。
Eva喺節目中讚自己父母好開通，雖然兩老想佢讀法律，但見個女想讀社會學，最後亦由得佢自己揀。後來入咗大學，佢又話要去非洲旅行，父母隔住電話嚇呆咗十秒，嗰時係上世紀八十年代，唔係好多父母接受到單身女仔去到咁遠，不過最終都冇反對，只係提醒阿女記得打電話返屋企。
Eva喺父母身上學識「放手」，由得兩個女自由發展，但有時真係忍唔住變「常哦」，會催促佢哋早啲瞓。不過囡囡依家已經分別二十同二十二歲，想哦都唔哦得咁多，佢惟有學習忍功。講到青年置業「上車難」嘅問題，佢又唔係咁擔心兩個女，佢話最緊要計算自己嘅能力去到邊就得嘞！