為選立會主席做定工夫？

建制派有消息傳出，指立法會主席一旦真係為咗投票支持政改而辭職，IQ博士係接棒人選之一，貪佢冇競逐連任包袱，就算到時打破主席唔投票傳統，畀人鬧爆都唔驚。IQ博士講過打算下屆卸任，所以冇選票壓力，但如果佢真係選立法會主席就有拉票壓力嘞。大家應該記得IQ博士兩次選財委會主席，都有建制派議員倒戈，畀「卿姐」劉慧卿爆冷擊敗，雖則話IQ博士未必一定有機會選立法會主席，但有備無患，做定工夫冇壞。

立法會議員上海世博團舟車勞頓，喺上海有大宅嘅IQ博士前晚做東道主，喺屋企宴客，請團友同僚洗塵；今日議員回請上海市接待單位，佢又話攞十斤茅台請同僚飲，爭取感情分，攻勢強勁。佢咁活躍，唔知係咪提醒同僚佢嘅存在，立法會主席一旦出缺，唔好唔記得佢呢？

除咗打聯誼牌，佢亦一改懶懶閒形象，少有咁喺《給香港的信》撰文，加入熾熱嘅政改爭論，為保留功能組別同分組點票機制護航，話功能組別有防護牆作用，好多人怕立法會變晒直選，香港變成行福利主義，最近高鐵就係好例子，如果畀泛民嘅修訂通過，香港想唔被邊緣化都難。

佢可能驚陳腔濫調太悶，仲提出咗個新睇法，話《基本法》重視均衡參與原則，所以功能組別之外，亦應該要有直選議員，各佔一半。呢個觀點都算新奇，不過算唔算矮化直選議員呢？