小白觀點：揼本宣揚我國價值觀

澳洲一項「全球十大污染最嚴重國家名單」調查，我國榜上有名，中國人終於可以走向世界，得到全球人類嘅認同喇，恭喜恭喜！事實上，呢個殊榮真係得來不易o架，冇錯，華夏龍族有源遠流長嘅「髒亂吵」文化，但一直以嚟，僅止於喺社區鄰里間浸淫發霉，毒害不出國門，可幸近年大國崛起，經濟起飛，我哋終於可以向全球人類分享中國人嘅核心價值觀。

為咗等老外感受一下「獨污染不如眾污染」嘅推己及人傳統美德，於是乎，我哋有艘大型運煤貨輪開到去老遠嘅澳洲東北外海，明明有條航道唔走，特登要走捷徑，仲不惜工本猛咁漏油，搞到成個珊瑚礁群都黑麻麻。為咗乜呢？咪就係好似狗仔咁，要喺地球任何一個角落舉起後腳屙一篤尿囉！呢泡尿一啲都唔平o架，但為咗證明二十一世紀屬於中國人，值得呀！

Email：sunsiupak@gmail.com

Blog：http://sunsiupak.blogspot.com

阿豪觀點：十三億無敵公式護體

仲記唔記得前排內地嘅沙塵暴飛到周圍都係，連日本都賴嘢呀？澳洲一項「全球十大污染最嚴重國家名單」調查，中國榜上有名，而且仲係三甲之一添！

無獨有偶，今年年初有人公布過一個全球十五大受污染城市排行榜，結果我哋山西省臨汾市又係榮登三甲，而且一樣係第三名添。據講當地煤礦業興盛，經常搞到烏雲蔽日，喺當地晾衫嘅話，件衫會喺變乾之前變黑。

不過咁，中國始終都係老三啫，前面仲有巴西同美國頂住，況且我哋又可以用番「十三億無敵公式」嚟解釋。所謂「十三億無敵公式」，即係話任何問題除開十三億份，都係微不足道。呢嗱，中國嘅人均溫室氣體排放量，只係美國佬嘅五分之一咋嘛，仲未同你算舊數，計番以前積落到依家嘅排放量添喎！

Email：lukchiho75@hotmail.com

Blog：http://lukchiho.blogspot.com

網友觀點……

奧巴貓：美國冇理由衰過中國㗎喎，佢哋唔係成日講環保嘅咩？

阿基諾四世：實至名歸，全國人民與有榮焉呀！

棺材佬：美國一向視中國為競爭對手，連污染國排名亦鬥一番！

賓仔：唔知點解凡係衰嘢都好似實有中國份咁嘅？