小白觀點：內地公安手法利落
成日有人嘈話警察濫權，係唔係都用手銬鎖人，冇乜法理根據。好嘞，既然小市民咁多聲氣，警方終於從善如流，發出一份新內部通告，訂明除咗執行拘捕行動以外，警務人員懷疑有人精神紊亂以及維持公安時，都可以用手銬。咁即係點呀？講明白啲，咪即係話可以任用手銬唔嬲囉！
話時話，香港警察都算係咁㗎喇，你睇內地公安吖，基本上唔使點用手銬，有人精神紊亂挾持小朋友咩，連拉人都慳番，索性搵狙擊手一槍打瓜佢就算；至於正常嘅上訪者，反而一律當精神有問題處理。
反觀喺香港遇到警察，最多咪畀人捉返去剝光豬搜吓身，應該唔會有人再用電話簿隔住打心口咁落後啩。當然，並唔係因為警察素質好咗，而係依家要搵本電話簿都幾難，唔通要阿Sir出動佢部成皮嘅水貨iPad 3G版隔住咩！
Email：sunsiupak@gmail.com
Blog：http://sunsiupak.blogspot.com
阿豪觀點：總好過郁啲就開槍
警方之前強調用手銬，只係適用於被捕人士，點知最近又改口，話喺兩種情況，即係懷疑有人精神紊亂，同埋履行警隊職責維持公安同防止有生命同財產受損時，都可以用手銬……咁搞法，容乜易濫權㗎？呢個憂慮未嘗冇道理，始終人一旦有權喺手，都會傾向用盡佢，都係嚴格限制穩陣啲。
不過又要講番轉頭，睇番啲阿蛇嘅辦案作風，大家可能會比較體諒番警方。豪伯就曾經親眼目睹奇景：有次喺大牌檔見到兩枱食客霎氣，店方驚出事，於是報警求助。嘩，墟冚囉！冇耐一大隊警察掩至，只見佢哋如臨大敵，全部都配備透明膠盾牌，仲戴晒頭盔，好似要鎮壓一場暴動咁……
依家諗番，如果下下唔畀差大哥用手銬，佢哋激氣起上嚟掹槍咪仲弊？老實講，如果要豪伯喺中槍同被「塔」揀一樣，我都會揀後者啦！
Email：lukchiho75@hotmail.com
Blog：http://lukchiho.blogspot.com
網友觀點……
周仔：呢個指引即係話畀市民知，鎖咗咪使旨意投訴。
哨牙蛇：阿蛇操有手銬鎖人大權，士氣可提高唔少呀！
小民：用手銬都控制唔到自殺者嘅情緒，咁係咪要開埋槍呢？
少林弟子：學堂有冇教擒拿手呀？使鬼用手銬咁低能咩！