晚宴筵開二百二十席，有逾二千五百位嘉賓出席，晚宴搞得低調，但咁多名人雲集一堂，都好難唔被發現。晚宴嘅籌委會主席係丁午壽太太，副主席就係何超鳳（Daisy），而Daisy孖住讀緊女拔嘅囡囡一齊露面。

其他名人仲有教育局局長孫明揚同太太鍾小芬、港大校長徐立之夫婦、合和實業主席胡應湘夫婦、前建築師學會會長呂元祥夫婦等，新世界集團第三代接班人鄭志剛則純粹應好友邀請赴宴。藝人莫文蔚係女拔舊生，當晚作壓軸演出。據聞晚宴最終籌得逾一千萬元，款項將用作重建校舍、提供多元化課程、增加獎學金及學生津貼等用途，新校舍預計喺二○一一年秋季竣工。