股市連續兩日因為希臘同歐洲國家嘅財政危機而大跌，市場信心好虛怯，尋日更連二萬點呢個大關都失守過，好多股民都希望搵啲股壇明燈照吓。長年喺金融市場打滾、做過高官，家吓仲做埋港大經濟金融學院榮譽教授嘅中策集團主席馬時亨就好淡定，認為今次歐洲風暴對香港冇乜大影響，一副冷眼坐看風雲變嘅姿態。
肥亨尋日話，依家希臘國民對政府收緊銀根嘅政策咁抗拒，令國際貨幣基金（IMF）對出手相救有啲卻步。不過，大家實在唔使咁悲觀：「因為歐洲各國都係坐埋同一條船，如果呢個問題愈發愈大，佢哋一定會出手啦，唔幫希臘盞影響自己啫！」危機中，佢仲望到一啲好事，歐洲國家相繼出問題，好影響經濟走勢嘅息口睇怕暫時唔會升住，對香港未嘗唔係好事。
另一個好友就係立法會保險界議員陳健波，佢亦喺危機中睇到生機，佢話：「歐洲嘅資金都要搵出路o架，中國同香港嘅經濟咁穩定，啲資金分分鐘流過嚟避難！」仲揚言會趁低吸納，至於一般市民，佢就勸喻大家唔好亂借錢作短線投資。