希臘債務危機大有火燒連環船之勢，歐元匯價下跌，一般人可能以為黃金又做咗資金避難所，點知黃金價格近日都好弔詭咁下跌。我哋日前喺香港友好協進會嘅活動上，撞到有「金王」之稱嘅中華總商會永遠榮譽會長胡經昌，想問吓佢點解，點知金王都擰晒頭，話呢件事好唔尋常喎！
胡經昌話，喺兩年前、即係金融海嘯爆煲之後，好多投資者都對金融體系冇晒信心，致大筆大筆資金流咗去黃金市場，喺大家不斷炒賣下，金價理應只會愈升愈高，唔會跌先係，點知近日金價掉頭下跌。咁有冇趁低撈貨呢？胡經昌呻「冇錢入」。
胡經昌自爆受到前年金融海嘯影響，名下資產一度畀海嘯捲走近七成，依家雖然回咗啲本，冇當時咁傷，但仲未返番去海嘯之前嘅水平喎，難怪佢自謙冇錢買平金啦。