5．16補選投票日快到，政圈好多人都以腳投票，即係離開香港，不過亦有一啲不置可否。煲呔曾尋日喺立法會答問大會上被追問呢個問題，話自己仲考慮緊去唔去投票。無獨有偶，下屆特首疑似參選人、行政會議召集人梁振英（CY）都毫不避嫌咁翻叮煲呔曾嘅答案，話自己仲未決定喎。
CY近期頻頻曝光，對傳媒幾乎有問必答，但尋晚出席國際青年商會香港總會六十周年酒會時，竟然封嘴，仲話：「所有政治嘢，我咩都唔會答。」連佢最鍾意講嘅樓市問題，都係話：「唔講住，遲啲先講。」咁5．16去唔去投票呀？CY先勉強應句：「我未諗呢個問題，到時再講啦！」
佢雖然唔講政治，但就好踴躍同大家分享佢八八年獲該商會頒發傑青嘅事，話當年得獎時只得三十四歲，仲未自立門戶，而依家年輕人嘅舞台比佢當年大，又好容易衝出香港，面向世界。