邊主持立會 邊投票撐政改

今年嘅政改方案又到咗關鍵時刻，政府需要拉四名泛民議員轉軚，據講家吓未湊夠數，又到時候搵夠薑嘅人一邊主持會議、一邊投票支持政改。政圈傳言，外號「IQ博士」嘅中總代表黃宜弘係大熱人選。立法會規定主席一旦辭職，會先由內務委員會主席劉健儀（Miriam）暫代職務，並最遲喺主席出缺後三次立法會大會內進行補選，具體日期則由代主席決定，政圈估計Miriam應該會有咁快得咁快舉行主席補選。

而IQ博士大熱，係因為佢來屆好大機會棄選退休，中總班選民又唔會因為佢破例投票而唔支持佢。至於衝擊立法會傳統嘅憂慮，有人話IQ博士從政一向唔理外界聲音，由出席率、提問率等嘅大懶蟲、到「中指」事件，佢都面不改容，今鋪又點？IQ博士接受查詢時先「哈哈哈」大笑咗約六秒鐘，然後話：「呢個係假設性問題，我係唔會答嘅！」