Florence早幾日出席工聯會活動，戴住一個珍珠襟飾，佢話呢個係十年前結婚時媽咪送嘅陪嫁品，今個月中，佢就結婚十周年，呢件襟飾對佢嚟講別具意義，更係無價寶。

另一個愛珠人就係梁美芬，佢鍾情藏金，亦鍾意珍珠，佢話以前喺中大學法律，成日去沙田行街，最鍾意行日本潮服店，亦喺嗰度邂逅珍珠。佢第一次見到一對用珍珠做嘅耳環嗰陣，即時驚為天人，隨即入貨，但嗰時做補習半工讀冇乜零用錢，只可以買平平哋嘅養珠。不過隨住收入增加，可以愈買愈豪，依家最愛逛又一城嘅World Jewelry，嗰日見佢戴緊嘅都係三、四萬蚊一粒嘅南洋珠。佢仲講笑咁話，大家以後可以改口叫佢「珍珠芬」，唔使淨係叫佢「鼠王芬」咁悶。