答問大會前，煲呔曾懶醒咁先發制人，就政改同房屋問題講明立場，以為咁樣捉正議員嘅路數，點知唔少議員都追問貧富懸殊嘅問題，KK雖然係建制派，但為一班月入兩萬幾蚊嘅人士請命時，佢嘅提問都好尖銳，仲拆穿煲呔曾以諮詢換取時間。

KK質疑政府好多時都借諮詢嚟過橋，有啲政策一拖就經年累月未有結果，佢跟住好唔客氣咁數白欖：「好似跨區交通津貼同申領生果金嘅人士離境限制等，政府都話諮詢，但諮詢咗好長時間，到依家都冇結果。」跟住要求煲呔曾作出承諾。畀自己友窒，煲呔曾面容略顯尷尬。

社會向上流動數字被質疑

坐喺官員席嘅張建宗都唔好過，佢冇耐前先喺立法會辯論預算案時畀議員狂鬧，依家又畀KK順手插一刀，可見一味靠拖都唔係辦法。

除咗KK之外，仲有唔少議員關心貧富懸殊，仲攞英國同香港作比較，認為香港嘅貧窮問題好嚴重。煲呔曾回應時，好唔客氣咁同英國劃清界線，話本港唔應該同英國比，因為英國嘅稅收比香港高好多。佢跟住大講本港社會有向上流動嘅能力，提供嘅數字又遭到質疑。講到尾一句，政府計嘅數，同學界甚至團體計嘅數都唔一樣，玩弄數據呢啲花招，煲呔曾政府真係幾拿手！