講起嚟實在諷刺，新學制最大得益者唔係老師同學校，更唔係學生同家長，而係萬里之外嘅英國私立學校。呢，根據英國私校協會新鮮出爐嘅普查數字，今個學年新入讀當地私立學校嘅香港學生人數超過一千八百五十人，比上學年大幅增加一成三。

咁都未算誇張，協會估計，嚟緊九月份嘅港生海外升學高峰期，人數會比依家再大幅上升兩成。赴英留學人數狂飆，呢鋪正一係肥水流去別人田，益晒英倫私校咯。

叮！香港幾怪都有，呢頭好多學校因為收生不足面臨殺校危機，嗰頭一個個同學執埋書包「逃亡英倫」。情況不斷惡化，好明顯係教育政策出咗問題，具體啲講，係同學及家長用腳投票，表達對教改失去信心，唔肯再做白老鼠。

今年年初，考評局公布新中學文憑試同UCAS（英國大學及院校招生事務處）嘅分數對照制度。不過你有你公布，海外好多著名院校到依家都未公布對持有新中學文憑試「沙紙」港生嘅收生要求，令人懷疑呢個試喺海外嘅認受性。為免夜長夢多，唔少家長索性提早送子女去海外升學，以免到時銜接唔到，喊都無謂。

仲有呀，以往港生多數考完高考至放洋，今年仲多咗一班新學制下嘅中四生，臨時赴英插班升讀中五。原來佢哋為免兩年後同首批文憑試畢業生競爭升學機會，不如先行一步，到時直接喺英國升中六。

叮！聽落真係得個亂字。港府推行教改咁多年，花樣多多，成效冇乜，而且愈改愈亂，愈改愈無厘頭，愈改學生同家長愈冇信心，到頭來竟然搞到要集體「大逃亡」，你話教改係咪失敗吖？

講番新中學文憑試，就算當局賣花讚花香，仲去海外周圍推銷，但認受性始終成疑。嗱，文憑試並冇對應英國高考嘅B及D級，變相令香港學子要考獲更高成績至讀到自己心儀嘅大學，好明顯存在斷層啦。當局仲話可以同海外學制接軌，接鬼咩！

話時話，港府官員嘅子女家陣有幾多個真係喺香港讀完小學上中學，讀完中學考大學o架？佢哋早就將子女送咗去番邦讀番書啦。連制訂政策嘅官員都帶頭用腳投不信任票，唔係貪骨肉分離、天各一方好過癮，都係因為對本港教育制度失晒信心啫。

計太一叮話齋，自己子女送晒去浸鹹水，要普羅市民子女留低繼續做教改嘅白老鼠，港府官員咁搞法，分明係搵笨啫。叮！