小白觀點：局長可能患咗中耳炎

稅務局局長朱鑫源開記招，有人問佢個名「鑫」字點讀，局長話呢個字讀「蔭」，即係曾蔭權嘅「蔭」。點不知本報記者問過語言專家，再引埋《商務新辭典》，原來「鑫」字只可以讀「陰」，無論如何都唔可以讀「蔭」。

朱局長連讀音都要同煲呔曾拉上關係，朱局長你係得嘅。不過，朱局長如果唔係特登拉衫尾嘅話，咁就快啲去睇吓醫生好喎，因為聽講好多細路將「梳頭」讀成「多頭」，「洗手」讀成「睇手」，並唔係懶音咁簡單，好可能係患咗中耳炎呀。

講開讀音，有時盡信書不如無書，有個中文系博士成日出嚟扮正音專家，搵埋啲陳年舊音出嚟，「機構」要讀「機救」；「棟樑」要讀「凍梁」；「莖葉」要讀「衡葉」，真係聽到耳都側，如果博士搵到古書，證明「曾蔭權」可以讀成「真陰險」，咁就啱聽啲。

Email：sunsiupak@gmail.com

Blog：http://sunsiupak.blogspot.com

阿豪觀點：讀錯自己個名笑爆嘴

稅局局長朱鑫源話自己名「鑫」字讀「蔭」，仲笑笑口咁話呢個字有好多讀音，好多人都會讀錯。點知記者問番語言學者，至知個「鑫」字原來得一個讀音，就係讀「陰」字，即係話，讀錯嘅唔係別人，正正係朱局長自己喎！你哋話係咪笑爆嘴呢？

講開呢個鑫字，其實錯嘅又唔單止朱鑫源一個，港大醫學院前院長林兆鑫，都逢人就強調個鑫字應該讀作「襟撈」個「襟」，結果，當然係錯啦！所以話，為人父母幫仔女改名，唔好淨係貪意頭，見多金就揀個鑫字，如果五行欠火就起個「燚」字，超碼都花時間翻翻字典先。（by the way，燚係讀「役」）

講到正音，有一個有趣現象，就係一種叫「正音大師」嘅物體，但佢哋其實都係引字典啫。查字典，邊個唔識？咁咪即係話，只要統一咗字典嘅讀音就得啦，何須有勞大師指教？

Email：lukchiho75@hotmail.com

Blog：http://lukchiho.blogspot.com

網友觀點……

細路祥：局長讀錯音，令很多人認識呢個字，都算佢任內嘅德政。

納稅人：連自己個名都求其讀，稅局做嘢又係咪咁㗎？

馮京：佢個名英文串法同特首差一字母，話唔定南早又會搞錯。

學生王子：好彩朱局長唔係做老師，否則真係誤人子弟！