啱啱喺上海世博開幕獻唱嘅意大利男高音Andrea Bocelli，展開亞洲之旅，前晚喺香港表演咗一場，尋日已經飛咗去台北。前晚嘅演唱會吸引好多城中名人捧場，有份協辦做搞手嘅香江文化交流基金會主席江素惠話，最貴嘅三千三百八十蚊門券一早清晒，反而最平嘅六百八十蚊門券就去得相對慢啲，現場所見，旅發局主席田北俊夫婦、貿發局主席蘇澤光夫婦都有捧場。
當晚全場滿座，田少同查懋成夫婦都直認係Bocelli粉絲，田少話不嬲都有聽開，查太就仲誇，由Bocelli一出道就熱捧，查生仲收集晒佢所有唱片添。之前Bocelli喺世博演唱，畀人話咪嘴假唱，蘇澤光好不屑呢啲傳聞，話唔會去睇呢啲新聞。江素惠都話，可能係轉播時嘅錯覺。
咁多知音捧場， Bocelli都使出渾身解數，唱出多首歌劇好似《茶花女》等嘅名曲，又同女高音Sarah Brightman合唱，壓軸就同澳洲歌手Delta Goodrem一齊大唱經典情歌。不過台下嘅粉絲個個都陶醉喺佢嘅歌聲之中，完場時都無人肯起身。Bocelli惟有Encore，唱到第三首Encore之作《Time To Say Goodbye》嗰陣，觀眾都依然唔肯Say Goodbye，結果要四度Encore先可以落幕。