社民連秘書長季詩傑決定「棄大狀而從政」，季詩傑本身擁有大律師資格，但近來就唔多覺眼佢有上庭打官司。尋日，佢更向法院申請喺大律師名單中除名，準備留多啲時間從政。
季詩傑話，做大狀每次上庭都要朝九晚五，佢想留多啲時間做黨務，搞政治，所以決定轉做事務律師，加盟大學同學嘅律師樓，不過唔係做合夥人，而係由見習律師做起，至少做五年先夠資歷轉做合夥人喎。按照規矩，佢要先喺大律師名單中除名。
佢一心放棄做大狀，高院都原定尋日聽取佢嘅除名申請，點知個代表律師記錯日子，以為星期六上庭，所以尋日冇現身，申請需要押後處理。季詩傑早前疑被舊愛斬傷，之後同朋友去飲酒又無端端畀人打，依家連申請除名都蝦碌搞唔成，近期運氣認真麻麻。