希臘財困引發區內新一波金融危機嘅憂慮擴大，歐洲同美國股市前晚急插水，港股尋日一開市就大冧，恒指曾跌近五百點，股市恐慌情緒蔓延，投資界好擔心呢個風暴會席捲「歐豬五國」中其他財政不穩嘅國家，更有人話，金融海嘯啱啱過去年幾，如果再來個歐豬風暴就大件事。經濟動力嘅林健鋒就唔係咁睇，佢尋日話，美國前年唔救雷曼兄弟，結果搞出金融海嘯，有呢個前車之鑑，歐盟應該唔會當希臘同其他歐豬國家嘅災難冇到。
尋日立法會開大會，適逢股市大波動，政商界人士都好關心。問林健鋒點睇，佢定過抬油，仲話經過美國嘅教訓後，歐盟應該會出手相救，認為唔使咁驚。至於本港會唔會受影響，佢就話香港有祖國呢座大靠山，應該唔會有乜問題嘅。而且金融海嘯之後，亞洲嘅金融中心移向中國，所以唔使擔心。
講完股市後，佢都關心近期香港爆發嘅蝸居怨，林健鋒話自己對復建居屋有保留，但會建議政府恢復首置計劃，等啲小巿民可以借錢上車。佢仲建議準買家不妨考慮買二手、三手甚至稍舊嘅樓，然後慢慢換樓。