香港有好多同鄉會嘅社交網絡，早前香港台山同鄉總會成立咗個基金，前懲教署署長彭詢元做咗個基金會董事局嘅主席，因為佢嘅緣故，當晚有唔少唔係台山幫嘅紀律部隊阿頭到賀，包括入境處處長白韞六、消防處處長盧振雄都有現身。
盧Sir雖然唔係台山人，但去到個場合就全情投入，仲上台同國際名廚甄文達獻技添，鬼聲鬼氣嘅甄文達話，家鄉台山地勢近海，海產豐富，盛產鹹魚同鹹蝦，為咗將家鄉美食發揚光大，佢即場以呢兩樣材料炮製鹹魚炒蝦球及鹹蝦炒帶子做慈善拍賣，籌得五千銀。盧振雄亦義不容辭幫手「撲水」，上台同女拍檔唱咗首《兩忘煙水裏》，盧Sir開金口，話咁易就籌到十幾萬。富貴黨主席劉健儀亦係台山人，仲自爆台山話了得，不過工作太忙，家吓佢都未有機會返鄉下睇吓，但同鄉睇得起佢，委任佢做基金會嘅榮譽會長。