阿Paul話，呢款T恤係佢哋嘅隊衫，一共製作咗二百件，連佢律師樓嘅職員都有份，真係夠晒隊形。不過，白姐姐咁好心思，同區參選嘅黃毓民、張錦雄、黃永志、郭兆明、林依麗、佘繼泉及蔣世昌難免有壓力噃。

其實，林依麗尋日都有出招，唔知係咪有感商台近排因為出賣廣播時段畀政黨做節目一事，遭指係見錢開眼受到各方關注，佢聲稱要「反映有關業主立案法團貪污及迫害部分小業主」問題，準備購買商台時段，仲通知傳媒尋日中午到商台採訪添，點知十二點過後，佢都未到，記者於是打電話搵佢，結果一把疑似外傭聲音嘅人接電話話佢仲未起身，最後林依麗搞到一點鐘先去到現場，咁都得？